بابوسر ٹاپ: خیبر نیوز کی اینکر شبانہ اپنے خاندان سمیت لاپتا
بابوسر ٹاپ کے علاقے میں خیبر نیوز سے وابستہ معروف اینکر پرسن شبانہ اپنے شوہر لیاقت علی اور چار بچوں سمیت پراسرار طور پر لاپتا ہو گئی ہیں۔ فیملی 21 جولائی کو سیر و تفریح کے لیے بابوسر ٹاپ روانہ ہوئی تھی، تاہم اس کے بعد سے ان کا کسی سے کوئی رابطہ نہیں ہو پایا۔
ذرائع کے مطابق لاپتہ ہونے والے افراد میں شبانہ، ان کے شوہر لیاقت علی، بیٹیاں ایمل اور ایمان سمیت دو دیگر بچے بھی شامل ہیں۔ اہل خانہ کی جانب سے اطلاع ملنے پر ریسکیو ٹیموں نے فوری طور پر سرچ آپریشن کا آغاز کر دیا ہے۔
ریسکیو اداروں نے تلاش کے عمل میں جدید ٹیکنالوجی کے ساتھ ساتھ سراغ رساں کتوں کی مدد بھی حاصل کر لی ہے تاکہ لاپتہ افراد کا جلد سراغ لگایا جا سکے۔ حکام کا کہنا ہے کہ علاقے کے مشکل جغرافیائی حالات کے باوجود سرچ آپریشن مسلسل جاری ہے۔
عوام اور میڈیا حلقوں کی جانب سے اس واقعے پر شدید تشویش کا اظہار کیا جا رہا ہے، جبکہ حکام پر دباؤ ہے کہ لاپتہ فیملی کو جلد از جلد تلاش کیا جائے۔
